Guwahati, May 5: Assam Nagaon District-ni me·chik police Sub Inspector-ni gadangogipa jeni bimingkon Junmoni Rabha mingachim ua chametang kawatangko togi cha·ani mamlao rim·aha.
Togie cha·anio dos donggipa mandeko Rana Pogag minga. Ua an·tangko Oil and Natural Gas Corporation-o kam ka·enga ine togie manderangko company-ni ning·o kam sikjote on·a ine tol·e bang·a tangkarangko ra·ahachim. Uni indake togie cha·ani kamko rim·a man·e chametang Junmoni an·tangan badi ka·anio pangchake rim·aha. Dosi dakgipa mandeoniko ONGC-ni ge·sni mohor su·na jakkalgipa aro gipin lekkarangkoba man·aha ine police officer-oni kobor-na ui’ataha.
Kobor ra·timgiparangni sing·on, anga sakgittam manderangni angona re·bae Rana Pogag-ni gimin aganosa, uko togie cha·bokgipa mande ine ma·siaha ine SI Junmoni Rabha aganaha.
Junmoni Rabha aro Rana Pogag-ni gisepo kangbang stitgrikaniko batanggimin bilsini October-o dakahachim aro ia bilsini November jaoba bia ka·na tik ka·e donsoman·ahachim.
Junmoni Rabha-ko ia bilsi january jaoba MLA Amiya Kumar Bhuyan baksa telephone gita golpogrikanikoba social mediao a·gimikchi jangangaha ine gisik ra·atna man·a.
