Kokrajhar, May 9: Sombar salo, Assam a•dokni Kokrajhar a•jao bilsi 45 ong•gipa me•chik saksako ‘skal’ pil•a ine potchipenba, songni adita sak manderang so•ote galaha.
So•otako man•gipa me•chikara Kokrajhar a•jani Gossaigaon police station-ni ning•o donggipa Mohanpur songni Anjali Murmu minggipa ong•achim.
Police-rangni u•iatani gitade, ia me•chikni manggisiko Sombar pringo bolo dingdee dongakosa nikaha.
Ia me•chikko so•otani bidingo police-rang, mande sakgittamko rim•aha aro rim•ako man•gipa manderangara, Mohanpur songoni bilsi 16 ong•gipa Sunil Murdi, bilsi 16 ong•gipa Sapna Hembram aro bilsi 30 ong•gipa Prabinson Kisku ong•a ine police-rang u•iataha.
Ia a•selni bidingo police-rang, Chaikal Hembram minggipa mandekoba rim•na sandienga ine kobor on•aha.
Iandakgipa a•sel ong•anirangko champengna gita Assam Assembly, Witch Hunting (Prohibition, Prevention & Protection) Act 2015-ko pass ka•manahachim ine nikna man•a.
