Dibrugarh, March 14: Assam-o Bharatiya Janata Party (BJP) sorkariko rikpiltaina man•genchimode da•o bilsi bongani gisepon chi bananichi man•enggipa neng•nikanirangko namatgen ine Robibar salo, Union Home Minister Amit Shah, ku•rachakaniko on•angaha.
Robibar salo, Assam a•dokni Margherita-o Election-na BJP dolni tom•bimonganiko ong•atanio jinmana aganprakangengon, chengonin Assam a•doko chi bananirangchi manderang neng•nikanirangko man•rongengani gimin BJP dol, ia neng•nikaniko namatna kang•kare kaenga ine Amit Shah parakataha.
“Assam-o chinga sorkariko rikpiltaina man•ode Assam a•dokko chi banaoni jakgitel ong•atgen. Bilsi bongani gisepon chinga Assam-o chi bananiko namatgen. Chingni sattelite gita am•sandianirangko dakanio chinga chi bananiko chel•chakna gita science-ni bewalrangko jakkale bang•bata chiringrangkon joksreatna manchienga,” ine Amit Shah aganaha.
Margherita constituency-ni BJP candidate Bhaskar Sharma-na Union Home Minister Amit Shah, campaign-ko ka•engachim.
Assam a•doko niam gri napsrukanirangko champengna man•jahani gimin Anit Shah, Congress dolkoba matnangataha.
“Bilsi 15-na Assam-o sorkariko rikanio Congress dol, Bangladesh-oni niam gri napsrukbaanirangko champengsona man•jaha aro batesa uamang an•tangtangni vote bank-na gipin biaprangoniko niam gri rimnapbaaha. Assam-o chinga sorkariko rikpiltaina man•genchimode niam gri napsrukanirangkoba bon•atna ku•rachakenga,” ine Union Home Minister parakataha.
Assam a•doko torom aro jatko ma•ekatna jotton ka•aha ineba ua Congress dolko matnangataha.
