Guwahati, March 17: Secondary Education Board of Assam (SEBA)ni class 10-ni board exam-ko seatenggipao re·anggipa antio General Science subject-ni question paper joksretani mamlao nangchape, Assam CID-chi sandiataniko dakani ja·man ja·delgimin sak 14 baksana sak 13 damberangko man·chape gimik sak 27 mang chatro-chatrirangko da·o rim·na gita man·aha.
Mamlako sandiatmitingo, Assamese language question paper-ni joksoanikoba police-rang ma·sina gita cholko man·aha aro joljolan porikkako changgipinona ra·doataha.
” General science question paper-ni joksoani bidingo u·iatanirangko aro social media-rango manderangni watpipraataniko March 12 tariko koborko man·ani ja·man, Assam CID-ni ning·o mamlako segatenba am·sandianiko dakna a·bachengataha. Ia mamlao mongsongbate Upper Assam-oni Majuli, Dibrugarh, Lakhimpur, Sadiya, Dhemaji, ia biaprango question paper joksoaniko police-rang rim·a man·aha aro ru·utijan question paper joksogipa biap manchako aro mamlao jak donggipa sakgni, Pranab Dutta aro Kumud Rajkhowa-maangko rim·na man·aha” ine Assam-ni DGP G.P Singh koborna agan-talataha.
Batanggimin antisani gisepon Assam-o seatenggipa class 10-ni porikkao ge·gni subject-rangko dontongatna nangahani gimin, porikkako ra·ani chu·gimikkon nipilange nanga gita kamko ka·anggen ine Assam-ni Education Minister Pa Ranoj Pegu, Sukrobar salo parakataha.
“Dos dakgipaoni saksani Assamese question paper-ni joksoahanikoba aganani gimin, English-ko man·chape, da·o mikkangchi seatnakenggipa Modern Indian Language (MIL) subject paper gimikkon champengsoani gita porikkako dontonganggen aro gital tarikrangko SEBA u·iatgen” ineba Pa Pegu agandapataha.
Indake ong·engon, ia mamlako ra·e ia antini skanggipa salo Assam Assembly-ni warachakgipa dolrang assembly-ni a·palo aro ning·ao adita jegalanirangko dakangahachim. Apsandake, porikkani question paper joksoanina All Assam Students Union ( AASU)-ba a·dok sorkariko matnangangaha.
