Guwahati, Sept 1: Assam a•doko bobil dake chakatgipa ‘Jehadi’-rang baksa jak donggipa manderangko bon•atna rakbee kamrangko ka•engon, Budbar salo, bobil dolrang baksa jak donga ine potchipenggipa ‘Madrassa’ ba Muslim skul damsako Assam a•dokni Bongaigaon a•jao donggipa Jogighopa jolo pe•e galna a•bachengataha.

Koborko on•ani gitade, re•anggipa antio bobil dake chakatanina police-rangni potchipe rim•ako man•gipa Hafizur Rehman, ia ‘Madrassa’-o skigipani kamko ka•ani gimin sorkari, ia ‘Madrassa’-ko pe•e galchina ge•etaniko on•angaha.

Mongolbar salo Assam-ni police-rang, Al Qaeda aro Ansarullah Bangla Team (ABT)-o nangchakegipa dingtang dingtang lekkarangko ia madrassa-oniko man•aha aro uandaken ia lekkarangko man•ani ja•man ia madrassa-ko pe•e galchina gita North Salmara-ni Executive Magistrate, ge•etaniko on•angaha.