Guwahati, June 17: Assam a•dokoba mikkarang dontonggija waenganichi dam 25 a•jarango donggipa lak 11 manderang neng•nikanirangko chagrongna nangtokenga aro ia a•jarangoni gital bikotgipa Bajali a•jao chi bananirang bilongbatenga ine kobor on•aha.
Official-rangni u•iatani gitade, mikkarang dontonggija waangani a•sel Brahmaputra aro Gauranga chibimarang dal•bana a•bachengaha aro chirang joksruangenba, bang•a songrangon chirang banengaha.
Ia chi banenggipa a•jarango manderangni game ge•e cha•enggipa hectare 19,782.80 a•palrangko chi mripaha aro dam 1,510 songrangko chi banengaha.
Ia chi banenggipa biaprango manderangko nangchongmotana agrede noktangtangoni ong•katjachina district administration-rang mikrakataniko on•angaha.
Mikkarang dontonggija waangani a•sel Guwahati songjinmaoba gittamgipa salna chi bananiko nikna man•aha.
Guwahati songjinmani badiaba badiaba biaprango a•a ruronganirangkoba knasona man•aha aro Noonmati jolni Ajantanagar-o mande sakgittam saknaanirangko man•aha ine kobor on•aha.
Budbar salo, Assam a•dokni Baksa a•jao dontonggija mikka waanganichi Dihing chibima dal•bana a•bachengaha aro Subankhata jolo dolong ge•sa be•aha ine kobor on•aha.
