Dibrugarh, May 14: Sukrobar salo, Assam a•dokni Tinsukia a•jao donggipa Tingrai bazar-o grenade bomako gopretanichi saksa so•otako man•aha aro sakgittam manderang bilongbee saknaanirangko man•aha.

Boma gopretanio so•otako man•gipa mandeara Tingrai Hunkapukhuri-oni bilsi 25 ong•gipa Sanjit Singh ong•achim.

Ia a•sel ong•anio gipin sakgittam manderang, chong•motan Monjit Das, Sujit Talukdar aro Ganasyam Agarwala, bilongbee saknaanirangko man•skaaha aro uamangko bakan Assam Medical College & Hospital (AMCH)-ona ra•angaha.

Kobor on•timgiparangni u•iatani gitade, motorcyle bolgnio ma•sina man•gijagipa manderang re•baenba, saksa Turan Agarwalla minggipa mandeni hardware dokkan mikkango ia grenade bomako gale donangaha.

“Grenade boma gopretanio saksa so•otako man•aha aro sakgittam bilongbee saknaanirangko man•aha. Saknaa man•gipa manderangko sanna gita bakan hospital-ona ra•angaha. Da•o dipet chinga ia a•selni bidingo tale aganna man•kujaenga indiba chinga a•selni bidingo am•sandina a•bachengataha,” ine Tinsukia-ni SP P Vaibhav Nimbalkar parakataha.

Indake ong•engon, ia bomako gopretanio ULFA(I) bobil dolni manderang jak dongengnaba gnang ine kobor on•timgiparang parakatskaaha.

Re•anggipa Mongolbar sal (May-ni 11)-osan Assam a•dokni Tinsukia a•ja ning•o donggipa Khota Sema songoba grenade boma-ko gopretahachim aro ia boma gopretanio bilsi 12 ong•gipa bi•sa saksa so•otako man•skaahachim.

Adita salrangna skang, Assam a•dokni gital Chief Minister Himanta Biswa Sarma, uni chief minister ong•e ku•mikchetani ja•man ULFA (I) bobil dolni commander-in-chief Paresh Barua-ko tom•tomaona re•bapilna gita agangrikna okamatahachim.