Guwahati, Jan 3: India a•song gimikon Sombar sal dipet, bilsi 15-oni bilsi 18 ong•gipa chadamberangna COVID-19-ni tikarangko su•na a•bachengatahaon, Assam a•dokoba tika su•aniko Assam-ni Chief Minister Himanta Biswa Sarma, Dibrugarh a•jani Duliajan-o donggipa OIL Higher Secondary School-o a•bachengate on•angaha.
Assam a•doko bilsi 15-oni bilsi 18 ong•gipa chadamberangoni sak lak 20 chatro chatrirangko tika su•na gita nisanko donenga aro tikarangko a•doko donggipa pilak skulrangon su•angna gita sienga.
Assam health department-oni u•iatani gitade, Assam a•doko Board porikkarangko March-ni 10 aro April jani 12 tariko a•bachengna siengani gimin bilsi 15-oni bilsi 18 ong•gipa pilak chatro chatrirangna tika ponggnikon matchote su•na miksongenga.
“Bilsi 15-oni bilsi 18 ong•gipa chadamberangna skanggipa tikako chinga antisani gisepon matchotatna nisanko donenga aro iana chinga pilak skulrangkon bilsi 15-oni bilsi 18 ong•gipa chatro chatrirangni bimingko segate donchina u•iataha. Ma•a paarang Cowin-o register ka•na nangjawa,” ine Assam-ni health official parakataha.
