Guwahati Jan 4: Ia jani 3 tariko Assam-o donggipa Deepor Beel Wildlife Sanctuary-o songni manderang na·tok rim·susaaniko ong·atna gita man·chisoanirang dongani gimino West Police District-ni Deputy Commisioner of Police (DCP), 144 CrPc niamni ning·o rake beng·e donaniko on·angaha.
Ge·etaniko on·anggipao ma·sina man·ani gita, Assam-o donggipa Deepor Beel Wildlife Sanctuary-ni wilwilao aro uni sambao donggipa songni manderang aro Guwahati songjinmani a·palogipa dingtang dingtang biaprangoni manderang ia jani 3 tariko aro uni ja·mano songo na·tok rim·susaaniko ong·atnasigipao bang·a manderang tom·daknaba donga ine Guwahati Wildlife Division (DFO)ni Divisional Forest Officer, DCP West Police-ni Nabaneet Mahanta-na u·iataha.
Divisional Forest Officer-ni u·iatani gita, mande jinma tom·dake iandakgipa programrangko ong·ataniara Wildlife (Protection) Act, 1972-ni ning·o ge·etgimin niamrangni kosako dakbadeani ong·a aro sanctuary-o donggipa dingtang dingtang janggi gnanggiparangko nisiate uarangko nosto ka·ani gitaba ong·gen ine DCP police janapataha.
Deepor Beel Wildlife Sanctuary-o donggipa pilak janggi gnanggiparangko aro buring-bolgrimko chel·chakna gita ja·kurangko de·atna nangchongmotenga. Uni gimin, songni manderangni na·tok rim·susaaniko ong·atanio Deepor Beel Wildlife Sanctuary-ni wilwilao aro uni ning·o mande sak-bongana bate tom·dakna man·jawa ine office-oni dingtangmancha raken beng·aniko on·ataha.
Ia ge·etaniara, January 1, 2021 oni January 31, 2021 tarikona kingking ong·gen, indiba kamtangtangko ka·enggipa Executive Magistrate, forest officialrang aro police personnel iamangkode ia ge·etaoniko watenga ineba uno janapataha.
Unomiting, koborko man·soani gita dingtang dingtang na·tok rim·ani bosturang jekai majal, wa·aniko tariko milsi ba ugita dakgiparangchi Keotpara, Natunbasti, Heerapara, Nuapara, Borbari, Matia aro gipin songrangoni jatni bewalo na·tokrangko rim·giparang, DCP office-oni raken beng·atachi niamko donatgenchimoba uko manigija mijal January 3 tarik pringo na·tokrangko rim·tokaha. Indake, hajal manderangan ua biapona re·ange mitamrang na·tok brena aro mitamara maidake na·tokrangko rim·achim uko ninamanchan re·angtokaha.
Ua chiboloniko na·tok rim·susaaniko bilsiantin ong·atrongenganian Assamese-o Aska ine agangipa na·tokrangko breani aro uko pala-sim·anirangko chasong gitchamni manderangni dakbaronggipa bewalko tange rakkiani gita ong·a. Ua somaio na·tokrangko pala-sim·ani aro breani bewalrangko dakbaani gitade, na·tokrangko tochakanio togijan palatrongachim.
