Guwahati, Jan 25: A•songni gipin biaprango gitan Assam a•dokoba ‘Pathaan’ jawilwatko Budbar sal dipet mesokna a•bachengataha aro ia jawilwatko mesokanio da•o dipet maming so•sojengjeng ong•anirangko knasona man•kuja.

Re•anggipa January 20 tarikosan, Bajrang Dal-ni manderang, ia ‘Pathaan’ jawilwatko jegale, Narengi-ni LG Tower-ona re•angenba, ia jawilwatni poster-rangko ra•gale galtokahachim.

Ia jawilwato kal•gipa Shah Rukh Khan aro Deepika Padukone-ni noksarangkoba ia manderang, akchrakenba so•e galtokahachim aro ia jawilwatko mesokjachina gita cinema hall nokgiparangna mikrakatanirangko on•ahachim.

Guwahati songjinmani Narengi-o donggipa cinema hall-ona Bajrang Dal-ni manderang re•ange, iandakgipa kamrangko ka•ani ja•man ia jawilwato kal•gipa Shah Rukh Khan-ko Assam-ni chief minister Himanta Biswa Sarma, ma•sina jechakahani gimin Shah Rukh Khan an•tangan Sarma-na aro Gold Cinema-ni CFO Rajeev Bora-na phone ka•atskaaha.

Assam-ni chief minister Himanta Biswa Sarma-ni social media-o parakatani gitade, Bollywood-ni actor Shah Rukh Khan, una pringwalni 2:00 bajio phone ka•atenba, ia jawilwatko mesokgenchimode Guwahati songjinmao so•sojengjeng ong•ani cholrang donga ine kenchakaniko parakataha indiba ua so•sojengjeng ong•anirang dongjana gita chel•chakanirangko dakgen ine Shah Rukh Khan-na ku•rachakatskaaha.

Apsan daken Assam-ni DGP Bhaskar Jyoti Mahanta-ba ia jawilwatko mesokanio maming so•sojengjeng ong•anirang dongjawa ine ku•rachakaniko on•ataha.