Guwahati, Sept 6: Covid sajinmani a·sel poraichakram biaprangko ru·uta jarangna chipattokani ja·man, higher secondary-oni post-graduation-ona poraienggipa pilak chatro-chatrirangna Assam sorkari, mijal Sombar saloni dipet a·doko school, college aro university-rangko kullina gita a·bachengpiltaiaha.
Iani bidingo Assam Education department, Standard Operating Procedure (SOP) ba ja·rikna nanggipa niamrangko on·dapangan baksa, higher secondary, graduation aro post-graduation-ni final year-ko dakenggipa chatro-chatrirangna skie ra·chakram biaprangko mijaloni dipet kullie on·angpiltaiaha.
Indake ong·genchimoba, class 1-oni 11-ona, graduation-na skanggipa chang-sni semester-rangko dakenggiparangna, post-graduation-ni first year chatro-chatrirangnade online gitan klasrangko ra·angkuaigen ineba koboro parakataha.
Unbaksana, pilak skie ra·chakram biaprangko kullipiltaiengon, poraigipa chatro-chatrirangni klasrango dongna sika ba sikgijani aro Covid sabisiko man·batgipa district-rangko nigrikesa a·dokni skie ra·chakram biaprangko da·odipet kulliatenga ineba janapatjolaha.
