Silchar, Oct 31: Assam a•dokni Silchar a•jao silchidare jotdike, gari bolsako rim•gittangna jotton ka•ahani gimin mande sakgniko joltangni manderangan rim•e ja•mano police-rangna on•ataha.

Rim•ako man•gipa manderangara Bapu Sena Sinha minggipa mandeni depante sakgni, Bikramjit Sinha aro Bikranjit Sinha ong•achim aro uamang Haflong-oni ong•a ine uamang an•tangtangan police-rangna parake on•aha.

Ia garini driver Kajol Hussain Laskar-ni parakatani gitade, ia mande sakgni uni gariko Silchar-ni Park Road-oniko Airport-ona para ra•ahachim. Airport sokangna sion, ia manderang una gong 50,000/- tangkako on•e salbrina uni gariko uamangna para on•china aganaha. Ja•mano ua uamangna gariko on•na jechake uamangni parako gamaichina aganon, uamang an•tangtangni ra•bitgipa silchidarechi uko jotdikaha.

Uamangni uko silchidarechi jotdikon garini driver gariko ka•sinate bakan ong•kate katenba, an•tangko dakchakchina chrikwataha aro uamang sakgni uni gariko ra•e ua biaponi katna jotton ka•aha. Uamang gariko ra•e katna jotton ka•on, ua jolo donggipa manderangoni saksa garini chabiko ra•sekna man•aha aro uandaken ja•mano Udarbond jolni manderang ia sakgniko rike rim•enba ja•mano police-rangna pakwate on•ataha ine garini driver parakataha.

Ia mande sakgnioniko police-rang, pistol pongbri, mobile phone aro gipin bosturangko man•aha.