Silchar, Dec 30: Assam a•dokni Silchar jolo donggipa Mashimpur songo mande sakgittamko, tol•e tarigipa appointment letter ba kam on•ani chittirang baksa BSF-o napna re•baahani gimin BSF-ni sipairang rim•aha.
Ia mande sakgittamara Chandan Singh, Amit Kumar aro Sahil Paswan minggipa manderang ong•achim aro uamang pilakan Uttar Pradesh a•dokoni ong•achim.
Koborko on•ani gitade, ia mande sakgittam, re•anggipa December 21 tariko Mashimpur-o donggipa BSF headquarter-ona re•baahachim indiba ja•mano uamangni ra•bagipa kam on•ani chittirangko nion, ia chittirangara tol•e tarigipasa ine ma•sienba ia mande sakgittamko BSF-ni sipairang rim•aha.
Iani bidingo BSF official-rang am•sandie nion, uamangna ia tol•pinapgipa kam on•ani chittirangko Siliguri-oni tol•e cha•gipa mande saksasa on•ataha aro uamangoniko iana gong lak 21 tangkaranko ra•aha ine BSF official-rang ma•sina man•aha.
