Tura, May 22: Garo Hills-ona Assam a·dokoni niam gri napsrukbaanirang batroroengani gimin niam gri napsrukaniko nambate nirok sandina man·na gita Garo Hills-ni sima ari jolrango police camp-rangko kulidape on·china Garo Hills Autonomous District Council (GHADC)-ni deputy chief executive membor Nikman Ch Marak, a·dok sorkariko didiataha.
Iani bidingo a·dokni Chief Minister Conrad K Sangma-na sedoatengon, West Garo Hills a·jani a·kawe jolrangona Assam a·dokoni manderang niam gri napdrabae nokrangko rikenga indiba sima ari jolrango niam gri napsrukbaanirangko nirok sandina gita police camp-rang chu·onga gita dongjani a·sel niam gri napsrukanirangko champengna man·jaenga ine GHADC-ni deputy CEM parakataha.
Marak-ni parakatani gitade, West Garo Hills a·jani a·kawe jolrango da·o dipet Tikrikilla police station damsasan dongkuengani a·sel Assam-oni niam gri napsrukanirangko name nirok sandina man·jaenga aro iani a·selan Assam-oni manderang niam gri Garo Hills-ona napsrukbana cholrangko man·engachim.
“Uni gimin Assam-oni niam gri napsrukbaanirangko nambate nirok sandina man·na gita Garo Hills aro Assam a·dokni sima ari jolrango police camp-rangko kulidapna nangchongmotenga aro ian Garo Hills-ni chadamberangna kamrangko ong·katate on·aniba ong·gen,” ine GHADC deputy CEM parakataha.
Indake ong·engon, North Garo Hills a·jani district administration-ko mangrakbatatan baksana Raksamgre civil sub-division-ko chu·gimik bil gnangate kam ka·china gitaba GHADC-ni deputy CEM, a·dokni Chief Minister-ko didiataha.
