Shillong, Feb 22: Meghalaya Assembly-ni gitcham speaker MM Danggo aro Umsning-ni MDC Macdalyne S Mawlong, Mongolbar salo National People’s Party (NPP)-o napaha aro re•baenggipa 2023 bilsini Assembly election-o uamang sakgnian NPP-ni tikitchi susaanggen ine NPP-ni national vice president aro Meghalaya a•dokni Deputy Chief Minister Prestone Tynsong parakataha.
Tynsong-ni u•iatani gitade, Assembly-ni gitcham Speaker MM Danggo, Ranikor constituency-oni susagen aro Umsning-ni MDC Mawlong, Nongpoh constituency-oni susaangskagen.
Nongpoh block aro Ranikor block committee-rangko gital daktaina nanggnok ineba Tynsong parakataha.
Ia sakgni dilgiparang baksana gipin dilgiparangba ia apsan salon NPP-o napangaha.
NPP-ona rimchaksoaniko man•ani somoio Umsning-ni MDC Macdalyne S Mawlong, jinmana aganprakengon, NPP-ni bak ong•epaahani gimin an•tangni kusi ong•aniko parakangenba, a•dokni namgnina dingtang dingtang namroro silroroani kamrangko ra•baaha ine NPP-ko mittelpilangaha. NPP-o ua manderangni namgnina kamrangko ka•anggen ineba ua ku•rachakaniko on•angaha.
2023 bilsini Assembly election NPP chu•sokgipa ong•telgen ine an•tangni ka•dongsoenganiko parakatengon, a•dokni Chief Minister aro NPP-ni national president Conrad K Sangma-ni dilanio ua apsan kamrangko ka•rimna nichaksoenga ine Mawlong parakataha.
NPP-o napanggipa MM Danggo, Macdalyne S Mawlong, Nongrem aro gipin dilgiparangko NPP-ni national president Conrad Sangma-ba rimchaksona gita cholko ra•skaaha.
Macdalyne saksa me•chik dilgipa ong•e da•o NPP-ona re•baahani gimin uamang da•o me•chik aro chadamberangko mangrakbatatna gita kamrangko ka•na man•gnok ine Sangma parakataha.
NPP-ni mongsonggipa miksonganian manderangna dangdike on•ani ong•a ineba ua, NPP-o napanggipa dilgiparangna gisik ra•ataniko on•angaha.
