Shillong, Feb 8: Meghalaya Legislative Assembly-ni gital nokko da·o Shillong, Mawdiangdiango rikatenggipako ia bilsion matchotatna krengenganio, a·dokni skotong minister Pa Conrad K. Sangma baksana Meghalaya Assembly-ni agan-chalaitimgipa Pa Metbah Lyngdoh-maang ja·pangchina doange da·al Sombar salo gnigipa changna Lok Sabha-ni aganchalaitimgipa Pa Om Birla-ko grongtaienba a·doko da·o gital Assembly nokko rikatenggipani bidingo a·dok sorkarini chagrongenggipa dingtang dingtang neng·nikanirangko janapan baksa kamrangni matchotangengahanikoba una talate on·angjolaha.
Ia gital rikatenggipa Assembly nokko somai dongimino matchotatna man·na gita ma·mong sorkarini dakchakataniko nangchongmotengani giminba Meghalaya Assembly-ni agan-chalaitimgipa uko grongani somaio janapjolaha.
Lok Sabha-ni agan-chalaitimgipako da·al Sombar pringo a·songni skotong New Delhi-o grongangani somaio, a·dokni gital Assembly nokko rikatenggipani bidingo uko Shillong songjinmaona re·bachina gitaba a·dokni skotong minister Pa Conrad Sangma aro agan-chalaitimgipa Pa Metbah Lyngdoh-maang mol·molaha.
Indake ong·engon, Pa Om Birla-ni a·dokona wenbagniko ia February jani 25 ba 26 tarikrangko tik ka·ede niataha, indiba uni re·bachongmotani sal ba tarikkode ja·mano a·dok sorkarina u·iatanggen ineba knasona gita man·enga.
