Shillong, March 10: Kal•susaanirangni ba sports ni bidingo MLA Eugeneson Lyngdohni sing•anina sports minister aganchakna jajae dringoni ong•kate kataha.
5 gipa budget sessioni salo kal•susaani bidingo sing•miting somaio sports minister incharge jajajiji dake aganchakna man•inggija dongaha. Banteidor Lyngdoh jean People’s Democratic Front-niba padot ong•engachim, Assembly tom•ao aganchakengon, sports policyko 2019ni 12 tariko on•ani tapan kamrangko name ka•na a•bachengengahachim indioba covid sajinmani a•sel pilak kaman ja•donggae dongna nangkuaenga aro ia kamrangko niame ka•na re•baenggipa ja 3 ni gisepon departmentni gita ka•chakatgnok ine u•iataha.
Meghalaya a•dok ge 36 kal•susaani gnanggipa National gamesko sokachakna nangengani bidingo aro kal•susagipa aro coachrangko rakkiani gimin Eugeneson-ni sing•anina aganchakengon, sports departmentni, Meghalaya State Olympic Association (MSOA) baksa chanchigrikmanaha aro pilakkon nigrike kam ka•engaha ine talatangaha. National gamesko sokachakna rikna nangenggipa nokrangni gimin Lyngdoh sing•taion sports minister dringoni ong•kataha aro adita minuterangni ja•man napapile aganchakengon, “studiumrangko rika-cho•anirangko dakkuenga, aro dingtang dingtang nanganirangko nigrike pilakkon tarisoengaha” ine aganchakaha. Baita sakni gita athletesrangna sports quotani gita kamrangko on•enga ine Eugeneson-ni singa•anina aganchakengon, iakode MPSC baksa kamna rakkiani bidingo aro job quotani bidingo sing•grike ka•na nangani dongkuenga ine aganchakskaaha.
Kal•susaanirango a•dokni chadamberangko bak ra•atpana aro uni a•bao nambate dakangna gita sorkari uamangna dingtang dingtang program aro workshoprangko ong•atenga ineba sports minister aganchakaha.
Dol 29 sports association rangna Meghalaya sorkari ia somaio kror 1 tangkarangko chamtaiaha. Da•skario 2021-2022 ni financial yearni gita Sorkari, lak 8 tangkarangko Archery association-na, Lak 3 tangkarangko Meghalaya Athletic Association-na, lak 3 tangkarangko Meghalaya Badminton Association-na, lak 3 tangkako Meghalaya Billiard and Snooker Association-na, lak 3 tangkarangko Meghalaya Boxing Association-na aro lak 3 tangkarangko Meghalaya football Association-na on•angaha ine u•iataha.
AITC ni MLA Zenith Sangma, National Games ko sokachakama sokachakjawa ine sing•anina aganchakengon ” National games darangchiba re•angjawa, ia bilsiba ong•chong, mikkang bilsiba ong•chong an•ching a•dokon ong•aien” ine ua aganchakaha.
