Shillong, June 9: Atma Nirbhar-ni gong kror 1345 ong•gipa loan-ko chotpilna gita sorkari, Meghalaya Energy Corporation Limited (MeECL)-na chu•gimik tangka paisarangko dakchake on•gen ine Budbar salo, Meghalaya a•dokni Chief Minister Conrad K Sangma parakataha.
Meghalaya a•doko bijolirangko suale on•anichi MeECL-ni man•enggipa kajinarangko nambate chimongna gita Power department, talate on•angani ja•man Atma Nirbhar-ni loan-ko chotpilanio MeECL-na chu•gimik dakchakaniko on•na gita Budbar salo Meghalaya Cabinet, kang•kare kae ra•angaha.
Chief Minister-ni parakatani gitade, batanggimin bilsirangonin MeECL, dingtang dingtang power company-rangna gong kror 1300 batpile grorang dongkuengani gimin ian Meghalaya sorkarina ra•biani ong•enga. Atma Nirbhar-ni on•enggipa loan-rangchi ia grorangko gamna gita jakkalangskagen ineba Chief Minister parakataha.
Atma Nirbhar loan-ni gong kror 600 ong•gipa gnigipa bakko on•na gita REC – Power Distribution Company Limited (REC-PDCL)-ni dongimin niamrangni bidingo janapatskaengon, skanggipao Meghalaya sorkari, da•o bilsi 10-ni gisepo gong kror 2000-ko chotna gita MeECL-na chu•gimik budgetary support-ko on•gen aro gnigipao REC-PDCL-na distribution franchise (DF)-ni bimango adita bakkode dakchake on•angskagen ine Chief Minister parakataha.
“Kajina gilanirangko nambatatgen ine MeECL aro Power department, REC-na DF-ko on•gija chu•gimik tangka paisani gita dakchakchina sorkariko didiaha aro MeECL-ko gital daktaina tarigimin map-koba Power department sorkarina mesoke on•angaha,” ine Chief Minister aganaha.
MeECL-ni gamna nangenggipa grorangara bang•dugaaha ine nikenba a•dok sorkarini gamna nanggipa bojako komiatna gita Power department, MeECL-ni mitam distribution circle-rangko REC-na pakwate on•skachina aganahachim ine nikna man•a.
Chief Minister-ni u•iatani gitade, Budbar salo Power Minister-ni dilanichi a•dok sorkari, power department aro MeECL-ni chairman baksa tom•aniko ong•atangaha aro ia tom•anio uamang, MeECL-o dingtanganiko ra•bana aro aggregate technical & commercial (AT&C)-ni gita noksan ong•aniko komiatna ku•rachakangenba, MeECL-ni DF-ko REC-na pakwate on•jachina sorkariko didiangaha.
“Anga MeECL-o kam ka•enggiparang baksaba tom•e chanchirimangaha aro uamangba power minister-ni agana gitan MeECL-ni DF-ko on•gija Atma Nirbhar-ni loan-ko chotna chu•gimik tangka paisarangko chame on•china sorkariko didiangaha. Mikkangchi MeECL-o kam ka•enggiparang aro engineer-rangba ku•cholsan kamko ka•e dingtang dingtang kamrangko chu•sokgipa ong•atna ku•rachakangaha,” ine Chief Minister parakataha.
Ia tangka paisarangko a•dok sorkarini man•enggipa dingtang dingtang cholrangonikon bikotgen ineba Chief Minister, Cabinet-ni tom•anio talate on•angaha.
Batanggimin bilsi 10-na dingtang dingtang power company-rangna bangki dongkuenggipa grorangko chotna gita MeECL, ia Atma Nirbhar loan-ko ra•ahachim ine nikna man•a.
Ia loan-ko on•anio REC aro PFC-ba Meghalaya sorkarina niamrangko donskaahachim.
