Shillong, Sep 4: Azadi ka Amrit Mahotsav ba India a·songni jakgitelaniko man·aoni bilsi 75 gapaniko maniani bak gita Meghalaya a·dokni matgrikrangko gisik ra·na Union Ministry-ni ning·o Shillong Law College aro Positive Energy Art Foundation (PEAF) nangrime salgittamna ‘Ka Tynrai Jong Ka Longrynieng’ ba ‘Roots of Identity’ program-ko Shillong songjinmani U Soso Tham Auditorium-o ong·atangaha aro ia program-ko Sonibar salo matchotataha.
Ia program-ko matchotatani salo, Culture & Parliamentary Affairs-ni Union Minister of State Arjun Ram Meghwal, mongsonggipa sokgipa ong·e jinmana aganprakangengon, a·dokni matgrikrang, chong·motan U Tirot Sing Syiem, U Kiang Nangbah aro Pa Togan Nengminja Sangma-ni a·dokna on·gilanirangko gualjachina gita a·dokni manderangko didiangaha.
India a·songni jakgitelanina krengdilanggipa manderangni gimin chadamberangna u·iatna gita sorkari kamko ka·enga ineba Meghwal aganaha.
Salgro salaram a·dokrangni aro mongsongbate Meghalaya a·dokni daka rikanirangko tang·doatna gita ia program-ko ong·atahani gimin ua dingtangmancha Shillong Law College aro PEAF dolkoba mittelpilangaha.
Ia salgittamna ong·atanggipa program-o dingtang dingtang susaanirango chegiparangnaba ua boksisrangko suale on·angjolaha.
Ia program-ko matchotatani somoio a·dokni MLA Ampareen Lyngdoh aro gipin dilgiparangba dongpae bak ra·angaha.
