Tura, May 10: South Garo Hills-ni dolgittam NGO-rang, chong·motan, ADE, AYWO aro NGCO, Baghmara Civil Hospital-ko Sombar salo re·ange nirokeanikon dakon hospital-ko rikatani kam tik ong·gijanirangko nikbaenba NGO-rang suk ong·gijaniko parakataha.
Hospitalona re·ange nirokangani bidingo NGO-rangni Butbar salo koborna seachi u·iatgipao, Baghmara Civil Hospital-o sagiparangni tuchichakgipa biapo nokking selani a·selan mikkarang wajokode kutturi gimikon chirara dakpilenga aro basakobade sagiparangan rimilana ga·akpilenga aro uasan ong·aija, doctor aro nurse-rangni dongchakenggipa biapo mangba chirang selenga ine janapatan baksa, hospitalo donggipa paikanarangba rongtalja aro hospital-o ringani chikoba chu·onga gita man·ja ine NGO-rang suk ong·gijaniko janapataha.
Iani bidingo Baghmara -ni dolgittam NGO-ni dilgiparang, Hospital-ni Superintendent-ko grongon hospital-o namgija nokrangko rikna, paikanarangko tarina gita da·odipetde a·dok sorkariba tangka-paisarangko on·a dongjachim ine NGO-rangna aganataha.
Indake ong·engon, South Garo Hills-ni skotongo rikgipa Civil Hospital-ko gong·raken taridape on·china gita a·jani dolgittam NGO-rang, a·dokni skotong minster Pa Conrad K Sangma-ko mol·molatjolaha.
