Shillong, Mar 15: West Garo Hills a•jani Jengjal-o donggipa Baljek Airport-ni runway-ko kilometre 2.2 bate tarina sorkari kam ka•enga ine Mongolbar salo, Meghalaya a•dokni Chief Minister Conrad K Sangma, Assembly-ni budget session-o parakataha.
Baljek Airport-ko jakkalchipna man•kujaengani gimin Assembly-o Kharkutta-ni MLA Rupert Momin sing•doangahachim.
Ia airport-ko kulina gita 1995 bilsion gong kror 12.52-ko sorkari chame on•aha aro 2008 bilsio kulie on•ahachim ine talatangengon, ia airport-ko dal•dapatna gita sorkario miksonganirang dongama ine Momin sing•doangaha.
Uni sing•anina aganchakaniko on•angengon, Baljek airport-ara a•dokni mongsonggipa airport ong•ani gimin iako namdapatna gita sorkari kam ka•enga aro ia airport-ko bakan chalaina jotton ka•enga ine a•dokni Transport Minister Dasakhiatbha Lamare parakataha.
Transport Minister-ni aganchakanina taldapataniko on•angskaengon, Baljek airport-ni runway-ko bakrobatatna gita da•o a•a ra•dapani kamrangko ka•engaha ine a•dokni Chief Minister parakataha.
Baljek airport-ko dal•dapataniode maming ra•bianirang dongjawa ine talataniko on•angengon, Shillong-ni Umroi airport-ode dal•dalgipa aeroplane-rangko ra•bana gita dal•begipa a•brian aeroplane-rangni bilonaniko champengaigen ine Chief Minister parakataha.
Baljek airport-ni runway-ko kilometre 2.2 bate tarina gita sorkari kamrangko ka•enga aro iana da•o a•a breani kamrangko ka•engaha ineba Sangma parakataha.
