Shillong, May 11: Shillong, Barabazar ba Themiewmawlong Iewduh-o donggipa ge·sa nokni nokgipa Paul Leong-ni KHADC-ni kosako ka·mikkenataniko on·angani gimin showcause notice-ko sokatgen ine Khasi Hills Autonomous District Council (KHADC)-ni Trade and Water Resources-ko jako ra·enggipa council-ni executive member (EM), Kharbuki, Bristibar salo u·iatangaha.
Leong-na show cause notice-ko on·angnasienganiara, batanggimin salo Barabazar-o trading license donggija dokan dakenggiparangni kosako coucil-ni nirokanganiko dakatanina gipin jat dokan dakenggiparangna bhara on·enggipa nok nokgipani High Court-china re·na gita council-ni kosako ka·mikkenataniko on·ani gimin ong·enga.
Iani gimin Bristibar salo pil·satai, Iewduh aro uni wilwilao dokan dakenggiparangoniko trading license-rangko sandiatani ja·man kobor ra·timgiparangna aganangengon, adita salna skang, noktango je mandenaba dokanrangko bhara on·na gita jakgitel ong·a aro bil donga ine janapatgipa kacharini hukumko, nok nokgipa KHADC-na on·atskaahachim ine Pa Kharbuki u·iataha.
Leong-ni chu·gimik jakgitel ong·aniko janapatgipa kacharini hukum-ko chinga man·soaha, indioba KHADC-ni a·ja ning·o dokanrangko dakanio mongsongbate, bading-chiwalani, dokan dakani aro trading license dongani giminde district council-ni dongimin niam aro ge·etanirang gitasa ong·na ine aganangenba, council-ni a·ja ning·o gipin a·palchini manderangko jakkale bading-chiwalanirangko dakanio Leong ba gipin mandeba ong·china, district council-ni dongimin niam gita trading license-rangde sakantion dongna nangchongmota ine Pa Kharbuki agandapataha.
Iana skang, Pa Teibor Pathaw-ni dilanichi, district council-ni Executive Member-rang, Jambor War, Grace Mary Kharpuri-maang baksana council-ni Hima Mylliem-ni Syiem Ainam Manik Syiem, Shillong-oni dal·gipa bazar cha·chakgipa biapo aro wilwilao dokan dakenggiparangni lekkarangko tanggitik nirokanganiko dakataha aro apsandake, game-ge·e man·ani pilak bosturangna tangka de·aniko champengatna gita tik ka·anggipani gimin talate on·na, game cha·giparang aro bading-chiwalgiparang baksaba chanchirimaniko dakangjolaha.
