Shillong, Mar 23: Be•enni gita cholgri ong•gipa manderangna Shillong songjinmao re•a doani cholrangko namdapatchina gita Persons with Disabilities (PWDs) ba be•enni gita cholgri ong•gipa manderangna kam ka•enggipa dingtang dingtang dolrang, Meghalaya sorkariko didiangaha.
Ia dolrangni parakatani gitade, Shillong songjinmani dingtang dingtang biaprango ramarang chonani a•sel rama paksaoni paksaona re•batanio aro footpath-rang apchonani a•sel re•a doanirango neng•nikanirangko chagrongna nangtokenga ine Shillong songjinmani wilwilao be•enni gita bilgri ong•e dongenggipa sak 50 manderang uamangna badi ka•doangahachim.
Bus aro local taxi-rango badia rama gita re•enga uko mesokna gita maming chinrang dongjani a•sel nachil knagijagipa manderangba neng•nikanirangko chagrongna nangtokenga ineba ia dolrang parakataha.
Be•enni gita cholgri ong•gipa manderangni namgnina kamko ka•enggipa dolrangara, National Center for Promotion of Employment for Disabled People, Barefoot Trust, Meghalaya Deaf Association, Khasi Disabilities Association, Blind Lead Trust aro Meghalaya Liberation for Visual dolrang ong•achim aro uamang iandake be•enni gita cholgri ong•gipa manderangna re•a doani cholrangko namdapatchina a•dok sorkariko didiataha.
