Shillong, Aug 8: Tura-ni MDC aro BJP-ni state vice president Bernard N Marak-ko rim•anio politics-ni gita maming jak dongja ine Sombar salo, BJP-ni MLA AL Hek parakataha.
Bernard Marak-ni ‘Rimpu Bagan’-ko chadrapanio aro uko rim•anio politics-ni gita jak donga ine a•doko BJP-ko dilgiparang matnangtokengachim ine nikna man•a.
Marak-ko rim•anio politics-ni gita maming jak dongja ine a•kangatengoba, BJP-na kam ka•giparangko police-rang dokkol ka•na jotton ka•enga ine Hek matnangatskaaha.
Walni somoirango BJP-ni membor-rangko police station-ona okamate, maming a•sel gri baditaba kontarangna asongate donaniara kraani ong•ja ineba Hek parakataha.
Marak-ko rim•ani bidingo jakgitele am•sandichina gita BJP-ni dabianio Hek-ba an•tangni chakpaaniko parakataha.
Iandakgipa a•sel ong•anichi BJP aro NPP-ni nangrime kam ka•anio nangchakeaniko ra•bagenma ine sing•on, political dolrang nangrime kamrangko ka•na gitade man•aia indiba election-rangna kamrangko ka•aniode pilak dolrangan an•tangtangni miksongani gnangsa kamrangko ka•enga ine BJP-ni MLA parakataha.
