Nongpoh, Feb 13: Cha·nanggijanichi be·enni an·senggijaniko man·ani mamlako ja·manchake kobor man·soani gita, Ri-Bhoi a·jani Nongkrah songo biana alanio bakko ra·gipa mitam manderangoni cha·nangjae saa man·gipa me·chik aro bi·sarangko man·chape sak 40 mangko Nongpoh-ni hospital-ona rimbaaha.

Koborko man·soani gitade, re·anggipa anti Sukrobar salo Nongrang songo bia ka·enba manderangna alaniko dakahachim. Indake ong·engon, alanio bakko ra·gipa manderangni Sonibar pring walnin sana gita a·bachengtokahani gimin bakan uamangko Nongpoh-ni Civil Hospital aro Bethany Hospital-ona rimbae sanenga.

Cha·nangjae sagipa sak 40 manderangko da·o hospitalo nambata sana-bananiko on·enga aro gimikan ok re·a aro ka·rekana agrede maming sadapanirang dongjae an·sengkaltokenga, jekon cha·nangjani a·sel ong·aha ine doctor-rangni chanchichipenganikoba knasona gita man·aha.

Unomiting, songtango biana alanio wak be·en song·ako cha·gipa bang·aan saa man·tokahaniko da·o hospitalo sana-bananiko ra·enggiparang agan-talate on·angtokaha. Iandakgipa obosta ong·anina, a·jani District Medical and Health Officers (DM&HO), kakketko u·ina gita Ri-Bhoi-oni dolsa doctor-rangko ua songchina watatenba sandiataniko dakchina ge·etaniko on·angaha.