Shillong, March 2: A·dok gimiko bijoli kimitaniko a·bachengatani ru·utgijan chu·gimik ra·galpilahaoba changsatai MeECL-ni gitik-gitak dake bijolirangko kimitaniko Meghalaya-o a·bachengattaiahani bidingo namgipa chol-ramarangko sandie kamrangko ka·angna man·na gita a·dokni skotong minister Pa Conrad K Sangma aro Power minister Pa James Pangsang K Sangma-maang Mongolbar salo tom·gitike chanchirimangaha.
Iani bidingo Power minister Pa James K Sangma-ni koborna u·iatani gita, National Thermal Power Corporation (NTPC)-na tangka gamanio (Letter of Credit) adita neng·nikanirangko chagrongna gita nangengani giminsa MeECL a·doko da·oba bijolirangko kimittaina nangao ga·akengaha.
“Tom·ao, neng·nikaniko chagrongenggipani gimin aro iana mikkangchi kamko ka·anggnigipako agan-chanchigrikaha. A·doko da·omiting bijoliko watani a·bao neng·nikanirangko aro ra·bianirangko chagronenggipani bidingo aro NTPC-ni niam gita ja·rike dakatanirangko gong·raken ra·galpilna man·na gita ma·mongni ministerko gronge agangrikanggen,” ineba Power Minister taldapataha.
Tom·anio, Cabinet-ni ministerrang, Chief secretary Pa M S Rao aro Power department-oni adita sak officialrang gimikan bakko ra·angtokaha.
