Shillong, Sept 8: Politics-oni gimik bilsi 13-rangna chel·tange dongani ja·man Meghalaya-ni Home Minister gitcham aro Congress dolni dilgipa Pa R.G Lyngdoh changsatai politics-ni a·baona re·bapiltaina tik ka·angaha.
Pa Lyngdoh-ko iana skang uni HM ong·miting somoio a·dokni niam aro ge·etanirang baksana sorkarini kosako bobil dake chakatgiparangko jako ra·e nirokatani kamrango jaksrapani gimin namen niksengachim.
Politics-ona uni re·bapiltaina gita chanchiengani gimin Butbar salo kobor setimgiparangna agananganio, da·ororo a·doko pilak ong·enggipa obostarangko nike bang·a manderangni mikkangchi ong·ggnigipana jajrengsoe a·gipi dilgiparang aro chasong damberangni angona re·bae politics-ona pil·bachina mol·molstapani ja·man anga jechakdamna man·jaha ine Pa Lyngdoh aganaha.
Unbaksana, politics-ona uni pil·bana tik ka·aniara, mijamangmang State President-na gital seokako man·gipa Pa Vincent Pala-ni a·selba ong·jola ineba Pa Lyngdoh agandapataha.
Batanggimin somoio aro da·oni somoio Congress dolni kam ka·ani obostarangni gimin aro re·baenggipa 2023 bilsini Assembly eleksino a·doko chepiltana gita cholrang dongani gimin sing·on, Pa Lyngdoh an·tangni ka·dongsoaniko parakatan baksa iana ua an·tangni bil ama gita pilakni gitan dakchakanirangko on·naba aganangaha.
“Da·oming dintanggrikaniara, da·oni President-de saksa team player gita ong·skaa. Gimikni gita kam ka·anio ua (Pala), manderangko gronge uamangni agan-ku·pattianirangko ra·na namnikgipa ong·a, jean namgipa kamba ong·a aro iandakgipa kam skangrango dongbajahakon,” ineba Pa Lyngdoh agankuaha.
Jakgitelgipa dolrango bakrimskajani gimin sing·on, democracy a·songo chu·sokgipa ong·na rakbegipa kam ong·a jenan bakrimaniko aro chakpaaniko nanga ine Pa Lyngdoh aganchakaha.
NPP baksa bakrimgijani a·selde a·dokko uamang ong·gijaona dilangengani gimin ong·a ine aganenba, BJP dolni gimin aganode uamangni chanchiani ba miksonganirangna ua kenchaksoa ineba minister gitcham agandapataha.
Unbaksana, mande ra·ako man·na ba bilna miksongede ua re·bapiljaenga indiba a·dokni manderangni nangnika gita dolona re·bapile dangdike on·na gitasa uni miksongani ong·a ine parakatjolaha.
