Tura, June 4: West Garo Hills a·jani Rajabala Abima songoni saksa bilsi 13 on·ggipa me·a bi·sa, mijal June 4 tarik attamchibara 4 bajimango goera goa man·e a·damon sijolaha ine koborko man·soaha.

Ia a·sel-obostara Atchutangni mi a·palchi matchu rikna watatana re·angosa ong·aha ine koborna parakataha.

U·iatani gitade, iandake a·sel ong·aniko Abima songo skanggipa chang ong·e nikna man·aha, jeon goera goako man·gipa bi·sani gangipa chola aro shortpant gimikan gin·prakaha aro be·en-bimingba binekjolaha.

Indake ua bi·sani ga·ake dongako saoba nikenba sambachi re·ange sing·on ku·rang on·jani giminsa songni manderangna koborko on·atahachim, indiba rasong gribee songni manderang uni jangi galakosako nikeaha.