Shillong, April 30: Bilsi 18 batgipa manderangko COVID tika su•na, Sonibar sal dipet online gita bimingrangko segatna sorkari manchiangaha.
Meghalaya a•dokni Health Minister AL Hek-ni parakatani gitade, ia skanggipa bako a•dokni damgittam jillarango bilsi 18 batgimin manderangko tika su•angchenggen aro ia salgnini gisepon 42,000 COVID tikarang a•dokona sokbagnok.
“Samrang dongani kri chinga tikarangko su•anggen indiba a•bachenggipa bakode chinga Shillong, Tura, Jowai aro Byrnihat-oni a•bachenggen,” ine Hek parakataha.
Meghalaya a•dokona COVID tikarang sokbadapengaha ine parakatengon, Meghalaya a•dok gimiko bilsi 18-oni bilsi 45 ong•gipa gimik sak lak 15 manderangko tika su•na nanggen ine Health Minister parakataha.
Meghalaya a•dok gimiko bilsi 18-oni bilsi 45 ong•gipa manderangko tika su•na gita komibeoba lak 30 samrangko nanggenchim.
COVID-ni tikarangko Meghalaya sorkari, Serum Institute-oniko bi•atmanahachim aro ia samrangko sokate on•na gita ia institute jasa somoiko bi•skaahachim.
