Assam, May 12: Assam Cachar districtni bilsi 83 ni buchuma saksa, Indiani songpanggipa ine chanako man•a bilsi 22 na kingking dakgrikani ja•man, nanggipa lekka-pancharangko on•ani ja•man butbar salo Indiani citezenship ba India a•songni songpanggipa ine chanako man•paaha. Ia buchuma jekon Akol Rani Namasudra ine mingachim, uni depante Arjun Namasudra Assam Foriegner Tribunal officeoniko gipin a•songoni ine chanani lekkako man•e 2012 bilsio an•tangko so•ote siahachim, bilsi gipino uni nogipa Anjali Roy ba apsan obostaon ga•akahachim. ”Akol Rani jean Cachar districtni Katigorah police stationi ning•o donggipa songoni ong•achim, ua India a•songni songdongchongmotgipa ine sakkiko on•a man•aha. India aro Assamni a•ao atchikapgipa ine ua an•tangko sakki on•a man•aha aro Indiani ba Assamni songpanggipa ong•chongmota” ine Foreigner’s Tribunal officeoni on•gipa lekkao janapaha. Ia bilsini February jani 23 tariko Foreigner’s Tribunal officeoni Akol Raniko uni Indiao songdongchongmotgipa ine sakkiko on•china jetjetahachim, indiba ua nanga lekkarangko on•a man•jaha. Adita neng•be dakgrikani ja•man ua Indiani songpanggipa ine chanako man•aniara una namen katchabeani ong•aha.
