Tura, June 20: West Garo Hillsni Anogre songoni bilsi 43 ni mande Santison Marak Lucknow songjinmaoni Hussanganj minggipa biapo gimaenga ine koborna u•iataha.
Santison Marak mija June 2 tariko, Asclepius Wellness Private Limited ingipa companyni trainingna uni ripengskarang baksa nokoni ong•katangahachim. Ua gisikni gita adita tik ong•jani a•selo Delhi songjinmaon gimarikaha ine koborna u•iataha. Santison Marak-ko uamangni skigipa Guwahati Kamakhya Express rel garini ticket-ko ra•e Guwahati songjinmaona watatahachim. Salgipino ua pring 4 bajimango Lucknowni PIN code 226001 oni nokona phone ka•ataha aro an•tangko Lucknow songjinmao galone donangako aganataha. Name golposrangna ine phone ka•taion phone battery siangnasiako ua aganataiaha aro jotton ka•beoba un baksa golpogrikna man•jaha. Chinga sepangbatgipa police stationona re•ange iani gimin kobor on•eaha’ ine gmagipani jonggipa Anikith B.
Marak koborna aganataha. Santison Marakko uni jonggipa Lucknow songjinmao dongkame sandienga. Poster rangko hindi ku•sikchi see tape donaha aro police rangnaba king 700na baten poster rangko donbaaha indioba uko sandioba nikkujaenga ineba ua janapataha. Je mande ba uni gimin masigenchimode ba uko nikgenchimode ia mesokatenggipa number-ona (9366204614) call ka•e uiatpabo in•e uni jonggipa molmolataha.
