Tura, Jan 5: Da•o gital bilsi sokbaahani gimin, a•doko matchotkugija dongenggipa kamrangko ma•mong sorkariona ra•ange chu•sokatna gita a•dokni Meghalaya Democratic Alliance (MDA) sorkari ku•rachakaniko on•angaha.
Re•baenggipa March jao MDA sorkariko rikchengaoni bilsi gittam gapengahani gimin ia gital 2021 bilsio dingtang dingtang kamrangko chu•sokatna gita MDA sorkari kang•kare kaaha aro ia kamrangoni mitamde Meghalaya a•doko Inner Line Permit (ILP)-na resolution ra•aniko ra•chakan baksana Khasi aro A•chik ku•sikrangko Eighth Schedule-o ra•gatchina ma•mong sorkariko didianian ong•gen ine u•iataha.
“ILP baksana Khasi aro A•chikkuko Eighth Schedule-o ra•gatna Assembly-o resolution ra•giparangko man•chape, a•doko matchotgija dongenggipa dingtang dingtang kamrangni bidingo chinga ma•mong sorkari baksa agangrikanggen,” ine Sombar salo, Meghalaya a•dokni Deputy Chief Minister Prestone Tynsong parakataha.
Meghalaya a•doko songdongenggipa manderangni nanganirangko a•dok sorkari chu•sokate on•na nangnikenga ineba ua aganaha.
Delhi-ona re•ange ma•mong sorkarini dilgiparangko grongeani bidingo sing•on, MDA-ni dilgiparang bakan Delhi-ona re•angenga ine Tynsong parakataha.
“Chief minister, kamtangko ka•na re•bapilahaon chinga jinma apsan asonge chanchirimenba, matchotgija dongenggipa kamrangni bidingo ma•mong sorkarini dilgiparang baksa agangrikna Delhi-ona re•anggen,” ine Deputy Chief Minister parakataha.
MDA-ni dilgiparang, Delhi-ona re•angtaienba, Assembly-o pass ka•gipa resolution-rangko ra•chakchina gita ma•mong sorkariko didiegen ineba ua parakataha.
Assam a•dokni sima jolrango ong•enggipa obostarangni gimin janapatengon, ia bilsini gisepo Assam a•dokni general election-ko ong•atna siengani gimin da•o dipetde iani bidingo Meghalaya sorkari mamingkoba dakna man•kujawa ine Tynsong talatangaha.
“Ia bilsio Assam a•dokni general election-ko ong•atengani gimin chinga mamingkoba dakna man•kujawa indiba Assam-o election matchotahaon Chief Minister Conrad K Sangma-ni dilanichi MDA sorkari, iani bidingo ta•raken Assam sorkari baksa agangrikangtaigen,” ine Deputy Chief Minister aganaha.
