Imphal, Mar 20: Manipur a·dokni gitcham chief minister Nongthombam Biren Singh-ko Robibar salo BJP Legislature Party-ni dilgipana seoktaiaha aro uandaken ua joljol gnigipa changna Manipur a·dokni Chief Minister ong·e Manipur a·dokko dilangtaina siengaha.
Robibar salo, Manipur a·dokni gital MLA-rang baksa tom·e chanchirimangani ja·man iako ma·mongni Union Finance Minister Nirmala Sitharam parakataha.
Manipur a·dokni Imphal songjinmao gital MLA-rang baksa tom·e chanchirimanio Sitharam baksana Union Law & Justice Minister Kiren Rijiju-ba dongpaaha.
Iako parakatani ja·man Manipur a·dokni gnigipa changna CM ong·enggipa Biren Singh-na Sitharam, Rijiju, Union Minister Bhupender Yadav, BJP-ni national spokesperson Sambit Patra, state BJP president Adhikarimayum Sharda Devi aro gipin dilgiparangba, pul malarangko on·e namgipa skaniko paraktokaha.
Manipur Assembly election-ni result-rangko parakataoni sal 10-ni ja·man BJP-ni dilgiparang, New Delhi aro Imphal songjinmarango baditaba chang chanchirimenba, Biren Singh-kon gnigipa changna CM songangkuna tik ka·angaha.
Manipur-ni gital CM, Robibar walon ong·jaode Sombar salo, ku·mikchetenba biaptango asongangnaba gnang ine BJP doloni koborko on·aha.
