Shillong, Jan 6: Meghalaya a•doko Bharatiya Janata Party (BJP) gride darang dolba sorkariko rikna man•jawa ine Meghalaya BJP-ni state president Ernest Mawrie-ni a•kanganiko Sukrobar salo Opposition Trinamool Congress (TMC)-ni dilgipa Mukul Sangma jegalatenba, 2010 aro 2013 bilsirangoba ua BJP grian sorkariko rikna man•aha ine parakataha.
BJP gride sorkariko rikna man•jawa ine a•kange ra•aniko jegalatengon, iandake BJP-ni bilko ra•sekna jotton ka•aniara manderangni jakgitele seokaniko a•kanggopna jotton ka•aniko mesokani ong•enga aro ian dilgipako seokgiparangna namen ra•chakna man•gijani ong•a ine Sangma parakataha.
Iandakgipa kattarangko agananichi BJP, MLA-rangko brena ba tangka paisa jakkalsretanio jak on•na jotton ka•engama ineba Opposition dolni dilgipa sing•doataha.
“Ian uamangni namgijagipa miksongani aro gisik namgijaniko mesokani ong•enga. A•dokni manderangna uamangna kraa gita aganchakaniko on•skana nanga,” ine Sangma parakataha.
