Shillong, Oct 05: A·joltangni political dol UDP-ni MLA Pa Kyrmen Shylla jean da·o MDA sorkario Social Welfare-ni minister-ba ong·enga, ua bobil dolni jako sinade kenja indiba eleksino ama cha·riknasa kenbataia ine Mongolbar salo aganangaha.
“Political-ni dilgiparangko ka·mikkenataniko HNLC bobil dol ong·nikaiode ua an·tangba uamangni kosako maming ku·sakoba aganani dongjawa ine aganatan baksa, uamangni jako ong·oba Isolni jako ong·oba anga changsaode siaigen indiba eleksino ama cha·a man·nasa mangmang anga kenaia,” ine Pa Shylla agan-parakataha.
“Bobil dolni iandake politicalni dilgiparangko ka·mikkenatanikode anga ong·e nikja maina sorkarini kosako maiba neng·nikanirang dongode iarangko uamang agangrikaona ra·bana nangachim, indiba manderangko ka·mikkenate uamangni janggirangko indin ra·anikode anga ong·e nikja aro Sombar salo maibakai uamangni donanggipa bom gopretna nangbebeode politician-rangsan ong·aigija ramram manderangni janggirangba gimagenchim,” ine minister agnanangkuaha.
Janapjolna gita, bobil dolni gitcham dilgipa Cheristerfield Thangkhiew-ko goe so·otanio politicalni gita ning·joljol daksamoani gnang ine champengata man·gipa HNLC bobil dol mija Sombar salo matnangatenba, a·dokni pilak minister-rangkon uamang gogen aro darangnaba ka·sachakani dongjawa ineba bobil dolrang ka·mikkenate seatjolaha.
