Williamnagar, May 19: Rongrenggre forest reserve-oniko cha·ue bol salenggipa manderangko Sukrobar pringwalni 3:00 bajimango, A·chik Holistic Awakening Movement (AHAM) Eastern Zone Williamnagar-ni membor-rang, Forest department-ni manderang baksa rim·na man·aha ine kobor on·aha.

AHAM Eastern Zone-ni president Goera Marak-ni u·iatani gitade, ia manderang, Songsak reserve, Darugre reserve aro Rongrenggre reserve-ni bolrangko ronggimik ratongtongenba, pik up garirango badiaba biaprangona ra·ange, ua biapon ia bolrangko ratsridame donchengrongenba ja·mano mikka balwa rakani somoirango aro andalmiting somoirangosa ia bolrangko Assam aro gipin biaprangona salangrongenga ine uamang koborko man·soaha.

Ia manderangna ramarangko mesoke aro mikkang mikkang re·dile on·enggipa manderangara ia biaprangonin saksa sakgni jak donggiparang donga ineba uamang koborko man·soahani gimin, Sukrobar pringwalo uamang iandakgipa manderangko sandiangon, cha·ue bol salangenggipa manderangko Samanda joloniko nikeaha aro uamangko joljol Forest department-na pakwate on·ataha ineba AHAM Eastern Zone-ni president parakataha.