Shillong, May 20: Meghalaya a·doko salantian COVID-19-ko man·giparang batrorobaengon, Bristibar salsani gisepon sak 1183 manderang, COVID-19-na porikka ra·anio positive ong·aha aro uandaken da·o a·doko COVID man·e dongenggiparang sak 6,477 gapdoangaha.
East Khasi Hills a·jaoba COVID-19 ta·raken batrikrikengani gimin Budbar attamonin re·baenggipa May 31 tarikona kingking chu·gimik lockdown-ko ra·gatangaha aro uandaken Bristibar salo Shillong songjinmani ramarango bangbang ong·anirangko nikna man·aiaha.
Indake ong·engon, West Jaintia Hills a·jaoba May 21 tarik attam 6:00 bajioni re·baenggipa June 1 tarik pring 5:00 bajiona kingking chu·gimik curfew-ko ra·gatangaha.
Meghalaya a·dok gimikon COVID-19 batrikrikengani gimin Garo Hills-ni dambonga a·jarangko man·chape a·dokni pilak biaprangon manderangko COVID-19-na porikka ra·e nina a·bachengataha.
