Shillong, Feb 16: Budbar pringo boma tariani adita bosturangko Meghalaya a•dokni police-rang, gari bolsaoniko rim•na man•aha. Ia bosturangara, aluminium electrical detonator packet 24, detonator ge 1200 aro kg 305-na batgipa gelatin stick-rang ong•achim.
Police-rangni u•iatani gitade, Assam-o register ka•gipa garini bidingo koborko man•soenba, Byrnihat-ni police-rang, ia gariko pring 5:00 bajimango, Guwahati-chipakna re•angengmitingo rim•rikna man•aha aro ia garini mande sakgnikoba sing•sandiangkuna gita police-rang rim•aha.
“Budbar pringni 5:00 bajimango AS-01LC 1112 gariko Byrnihat outpost-ni police-rang rim•rikna man•aha. A•bachengode ia gariko neng•takchina aganon uamang sale katna jotton ka•ahachim indiba uamangko rike chingni sipairang, 12th Mile-o rim•na man•eaha. Ia garioniko am•sandion boma tariani bosturangko police-rang man•aha,” ine Ri Bhoi a•jani SP Giri Prasad, kobor ra•timgiparangna parakataha.
