Tura, Apr 3: Sonibar salo, Meghalaya a·dokni Chief Minister Conrad K Sangma, Ganol chibisikona re·ange Edenbari-o donggipa water pump-koba niangjolaha aro ia biaprangko nieani somoio ua samtangtango donggipa buring bolgrimrangni porongrong ong·roroangenganiko nike an·tangni suk ong·gijaniko parakangaha.
Songni nokni manderang, a·barangko so·e cha·engkuani a·sel buring bolgrimrang porongrong ong·angroroe chiring chibisikrangba tipangengahani gimin a·barangko so·e cha·ani pal manderangni janggi tangani cholna sorkarini on·enggipa dakchakanirangko ra·skachina gitaba Chief Minister, jolo songdongenggipa manderangko didiataha.
Manderang chu·onga gita chirangko man·jaengani gimin an·tangni suk ong·gijaniko parakatengon, da·ororo mikkarang wana a·bachengengahani gimin chirang jokna a·bachengengaha aro manderang chirangko man·na a·bachenggnok ine Sangma, ka·dongatani kattarangko aganangaha.
Chibisik donggipa pilak biaprangon bol wa·arangko name ripingchina gitaba Chief Minister didiataha.
Ganol chibimako tangatpiltaina gita Sonibar salo a·bachengatgipa Payment for Ecosystem Services (PES)-ni bidingo janapatengon, ia project-chi samtangtango donggipa chiring chibisik aro bol wa·arangko tangatpilna gita sorkari, jolni manderang baksa nangrime kam ka·gen ine Chief Minister parakataha.
Ia apsan salon ua West Garo Hills a·jao rikenggipa Ganol Hydel Project-koba niangjolaha aro ia project-ko sorkari bakan matchotatna krenge kam ka·enga ine parakataha.
Ia 22.5 Mega Watt-ni hydel project-ko matchotahaode Garo Hills-osan ong·aigija Meghalaya a·dok gimikon chu·onga gita bijoliko man·gnok ineba Sangma parakataha.
