Shillong, Oct 22: Buring-bolgrimko a·ba o·e cha·anichi pilak namgijanirangko, re·baenggipa salo chang 26-gipa United Nations Climate Change Conference (COP26)-ni tom·bimonganio chanchianiko naatna aganangani gimin Meghalaya-ni North East Slow Food & Agrobiodiversity Society (NESFAS)ni officialrang Sukrobar salo Member of Parliament (MP) Pa Vincent Pala-ni kosako jegale aganangaha.
Iani bidingo koborni manderangna aganangengon, NESFAS-ni executive director, Pius Ranee a·dokni MP-ni agangipa kattana uamangni suk ong·gijaniko parakatan baksa, MP an·tangan iako ning·tue sandichengani ja·manosa mamlako naatna nanga ine Ranee chanchiatangkoba parakjolaha. Unbaksana, ua saksa a·bri jatni mande ong·pae a·ba o·e cha·aniara jatni daka-rikanio namen gamchataniko ma·sina nangachim ineba uamang parakangkuaha.
“Iako pangkamatani cholrangko chinga nienga, iandake a·ba o·e cha·aniara gipinming bang·en dingtanggrika. Buringko a·ba o·e cha·ani bidingo Pala-ni agananggipa kattako chinga ra·chakna man·ja aro maming pangchakani gri. Buringko a·ba o·e cha·aniara chingni ma·gitcham-pagitchamrangni dakrongbewal ong·a aro jatni daka-rikani bakan ong·a,” ine Ranee aganangaha.
NESFAS-ni Senior associate research aro knowledge management, Bhogtoram Mawroh-ni aganpaani gita, biap damsaoni damgipinona jitroroe buringko a·ba o·e cha·ani gimin jera-ra·grikaniba batanggimin bilsirango dingtangaha ine parakatan baksa, a·ba o·e cha·aniara climate-ni dingtanganio maming nangchakeani gri batesa climate-ni dingtanganiko champengna namgniko on·paenggipa ong·a,” ine ua agandapataha.
Climate-ni dingtanganiko ra·bagipa coke karkanarang aro koela bikotaniko dakanirangni giminsa MP mongsongde chanchina nangbatachim indiba gisik cha·chipilani gnang a·ba o·e cha·anikosa ua jaksi otna nikaiaha ineba Pa Mawroh chanchiatangko parakataha.
A·dokni saksa environmentalist, Pa Hamkhein Mohrmen, chengo atchu-ambini chasongonin East Jaintia Hills a·jao buringko a·ba o·e janggi tangtokenggiparang gnang ine agane, iako dakanichi namgijaniko aganna skangba Pa Pala, ua manderangoniko nie skie ra·chengna nanga ine aganangaha.
