Shillong, Mar 13: Sombar salo, Meghalaya Legislative Assembly-ni Speaker Thomas A Sangma, Business Advisory Committee (BAC)-ni tom•aniko ong•atangaha aro New Shillong Township-ni Mawdiangdiang-o rikenggipa gital Assembly building-koba niangjolaha.
BAC-ni tom•anio Assembly-ni Speaker baksana, Parliamentary Affairs Minister Prestone Tynsong, gitcham Home Minister Lahkmen Rymbui, AITC-ni dilgipa Charles Pyngrope aro Umsning-ni MLA Celestine Lyngdoh baksana committee-ni pilak membor-rangan bak ra•angtokaha.
BAC tom•a matchotani ja•man kobor ra•timgipa manderang baksa agangrikengon, ia March jara finance-ni gita bilsini bon•kamgipa ja ong•engani gimin pilak hisaprangkon ia jani gisepon matchotatna nangenga ine nikenba, Budget session-ko March 20 tarikoni a•bachengate 28 tarikon matchotatna tik ka•aha ine Assembly Speaker parakataha.
Budget Session-na salchet somoiko donaniara chu•ongaigenma ine sing•anina aganchakaniko on•angskaengon, ia chango sorkari, private membor bill-rangko bakkandikatskaenba, gipin chang session-rang, jekai Autumn session-rango somoiko on•skana miksongenga aro ia changode private membor bill-rangna salgnikosan on•na tik ka•aha ine Sangma parakataha.
Speaker-ni parakatani gitade, Budget session-ni skanggipa salon, deputy speaker-ni kamnaba election-ko ong•atangjolgen.
Mawdiangdiang-o rikenggipa gital Assembly building-ni bidingo janapatskaengon, re•anggipa bilsini May 22 tariko protchong be•grugipa Main Chamber-na agrede gipin kamrang nanga gitan matchotengaha ine Sangma parakataha.
Gital Assembly building-ko rikani chu•gimik 80 percent-ni gitade matchotaha ineba ua parakataha.
