Shillong, Feb 15: Ri Bhoi a•jani Byrnihat-o donggipa karkanarango nangana bate wal•kurangko aro ma•manti moilarangko watengani a•sel jolni manderangna ma•man sabisi sakanchirangko ra•baani gita ong•enga ine changni chang badi ka•anirangko man•soahani gimin Mongolbar salo, Jirang-ni MLA Sosthenos Sohtun, ia karkanarangko re•ange nieaha.
Karkanarangko re•ange nieani somoio MLA baksana State Pollution Control Board-ni engineer, district administrator, Jirang-ni MDC Victor Ranee aro jolni dilgiparangba dongpaeaha.
Ia karkanarangko nieani ja•mano kobor ra•timgipa manderang baksa agangrikengon, State Pollution Control Board-ni jabol galna dongimin niamrangko ja•rikchina gita ua ia karkanarangko nirokenggiparangna seataha ine Sohtun parakataha.
Ia karkanarangoni wal•ku aro moilarang jokangenganichi manderangnasan nangchakeaniko ra•baani ong•jaenga indiba ian sambao donggipa chiring chibisikrangnaba nangchakeaniko ra•baani gita ong•enga ineba MLA aganaha.
Karkanarango jabol galaniko komiatchina aro gam•atanirangko komiatchina ua karkanako nirokenggipa mitam manderangna ge•etaniko on•manaha ine janapatengon, ia karkanarangni jabol galaniko name nitimchina Pollution Control Board-naba u•iataha ine Jirang MLA parakataha.
Mikkangchiba ua ia karkanarango jabol galani aro wal•ku watanirangko nina re•angtaigen ineba Sohtun aganaha.
