Guwahati, July 21: Rashtriya Swayamsevak Sangh (RSS)-ni dilgipa Mohan Bhagwat Assam-ona salgittamna re·baaha aro ua Monggolbar attamo Guwahati-ona sokbaaha. Uni aganani gita, Citizenship Amendment Act (CAA) aro National Register of Citizens-rangko ra·gatanichi darang Muslim-rangan maming namgijaniko ba gimaataniko man·jawa aro ian Hindu-Muslim-ko bak dakanio mamingba nangeja, badiaba dolni manderangsa an·tangtang namgnina jatsa jatgipinni gisepgriko jingjengatanirangko ong·atenga.
“1930 bilsionin Muslim manderangko terrorism aro a·songni tangdoanina ong·gija, mongsonggipa sason ka·gipa ong·atna bang·batatna miksonganirang gnang. Jedake, Punjab, Bengal aro Assam-rango an·tangtang skani gita kamrangko ka·na man·a gita Muslim manderangko bang·batatna miksonganirang gnang. Pakistan aro Bangladesh a·songrangode indaken ong·aha. Indioba, chinga saksa sakgipinko masichakgrike apsan ku·mong nangrime janggi tangna ska.” ine Gauhati University-ni Professor Nani Gopal Mahanta-ni ki·tap segipa ‘Citizenship debate over NRC and CAA: Assam and the Politics of History’ minggipa ki·tapko, Srimanta Sankardev International Auditorium, Kalakshetra, Guwahati-o tom·anio oprake on·a jamano Bhagwat aganaha.
Assam ni skotong Minister Himanta Biswa Sarma-ba tom·anio agananiko dakaha.
RSS dilgipani aganani gita, ia gital citizenship law-ara songsul a·songrango a·rikako man·gipa chonchongipa jatrangna naljokaniko on·gen, dingtangmancha Pakistan aro Bangladesh a·songrangoniko. A·songko bak daka jamanoba, Pakistan, a·songtangni chonchongipa jatrangko nirok-simsakjahaoba, an·chingde a·songtangni chonchongipa jatrangko nirok-simsakaha.
NRC-ni bidingo janape Bhagwat-ni aganani gita, pilak a·songrangan a·songtangni songdonggiparangko uina bil donga aro NRC-ara a·songo songdongkamgipa chongmotko sandiani cholsa ong·a. Ia kamde sorkarini ningosa ong·a. Badiaba dolni manderangsa an·tangtangni namgnina NRC aro CAA-ko bak man·ate jatsa jatgipinni gisepo jingjengatanirangko ong·atenga. Mahabharata-ni chasongonin Assam-onara gipin biapchini napagiparang dongachim, indiba niamgri skatang napagiprangna pangnaba ken·a nangani dongjachim. Jatsa jatgipinko masichakgrikanide dongna nanga indiba jatsa jatskana ken·a nanganide dongna nangja, ine ua aganaha.
