Meghalaya a·dokni SSA skulrango skigiparangna April aro May jagnini dormaharangko July jani gnigipa antio sorkari watatna siengaha.

India a·songni G20 Presidency-ni ning·o, Meghalaya sorkarini Meghalaya Basin Management Agency (MBMA), Observer Research Foundation (ORF) baksa nangrime Think20 (T20) Secretariat-ni bimingo, Think20 Conference-ko July 5 tarikoni July 7 tarikona Shillong-o ong·atenga.

Garo Hills-o aro mongsongbate Tura aro Williamnagar jillarango jal·likni dam rakdugaengani a·sel manderang neng·nikanirangko man·tokengaha.

Manipur a•doko so•sojengjeng ong•enganichi jagni batpile chipe donna nangani ja•man da•o skulrangko class 8-onade kulipiltaiaha.

Jowai-ni MLA Pa Wailadmiki Shylla-ni re·anggipa bilsi 2022-o a·bachengate on·anggipa Free Coaching Programme-o bak ra·gipa aro ia bilsini SSLC porikkao nambee chu·sokgipa chatro-chatrirangna mande ra·aniko dakna gita Mongolbar salo Jowai, Thomas Jones Synod College-o programko ong·atangaha aro ia programo JHADC-ni MDC -rang aro gipinrangni dongpaanio Pa Shylla an·tangan mongsonggipa sokgipa ong·e bakko ra·angaha aro West Jaintia Hills-ni DESO, Ma AP Syiem mande ra·ako man·na kragipa sokgipa ong·e bakko ra·angskaaha.

Meghalaya a•dokni Sports & Youth Affairs department, Meghalaya State Olympic Association (MSOA) baksa nangrime ‘Lead Program’-ko a•bachengataha aro ia program-ni ning•o international level baksana Olympics-rango susapana man•na gita saksku kal•susagiparangko training-na seokaha ine Mongolbar salo, a•dokni Sports Minister Shakliar Warjri parakataha.

Re•anggipa June-ni 5 tariko World Environment Day-ko mania intal Sikkim a•doko pang 1,15,000-na baten bolrangko ge•angtokaha.

Kuki National Organisation (KNO)-ara dol 17 Kuki bobil dolrangoni chubatgipa ge·sa dol ong·a, jemangan Kuki jatna Manipur-ni ning·o dingtang a·jako on·china gita dabiengachim ine nikna man·a.

Iani bidingo talataniko on•angengon, Solar Mission-na lekkani kamrangko matchotmanaha aro ia jani gisepon ia mission-ni bidingo jinmana parakatna man•aba dongaha ine a•dokni Chief Minister Conrad K Sangma parakataha.

Koborko on•ani gitade, ia matchurangko Assam a•doko donggipa Dhemaji-oniko Meghalaya a•dokona palsrukatengachim aro ia matchurangko ka•saninggija dake to salgipa truck gariosa dongnue salangengani a•sel matchurang nom•boktokahachim.