Tura, April 21: Budbar salo Garo Hills Autonomous District Council (GHADC)-ni gital chairman-ko seokna election-ko ong•atanio amako man•ahaoba, GHADC-o NPP-chi dilenggipa Garo Hills Democratic Coalition (GHDC)-na altuae executive committee-ko rikna on•jana gita Congress dol, chief executive membor (CEM)-ko seokanioba susapana tik ka•angkuaha.
GHADC-ni gital chief executive membor (CEM)-ko seokna gita Bristibar pring 11:00 bajio election-ko ong•atengani gimin Congress dolni gitaba CEM-ni kamna Dengnakpara-ni MDC Sadhiarani M Sangma-ko NPP-ni Benedic R Marak baksa susaatna tik ka•aha.
CEM-ni election-na Budbar salon, NPP-ni candidate Benedic Marak nomination-ko file ka•angaha aro Congress dolni gitaba Zenith Sangma-ni jikgipa Sadhiarani Sangma, Congress dolni MDC sakgni, chong•motan Ashahel D Shira aro Cherak W Momin-ni dakchakanichi nomination-ko file ka•angaha.
GHADC-ni gital chairman-ko seokani somoio NPP-ni MDC Rakesh A Sangma, 16 vote-rangko man•e, 12 vote-rangko man•rikgipa Congress dolni Cherak W Momin-ko 4 vote-rangchi cheahachim indiba CEM-ko seokna election-ko ong•atanioba Congress dol susaangkuna manchiangaha.
CEM-ni kamna susaenggipa MDC sakgni, chong•motan Benedic R Marak aro Congress dolni Sadhiarani M Sangma sakgnian gnigipa changna MDC ong•enggiparang ong•a aro NPP-ni candidate Benedic Marak-de Raksamgre constituency-ni MLA-ba ong•kuengachim.
