Hyderabad, Apr 8: Chadamberangni changa sapanirangko jakkale, India a•song re•mikkangangna nangenga ine Sukrobar salo, Meghalaya a•dokni Chief Minister Conrad K Sangma parakataha.
Hyderabad songjinmani Loyola Academy-o chang 43-gipa annual college day-ko manianio bakko ra•e jinmana aganprakangengon, chadamberangan a•songni dal•batsranggipa bil ong•a aro chadamberangni changa sapanirangko namao jakkalgenchimode uan a•songni gam-jinrang gita ong•na ama ine Sangma talatangenba, chadamberangko ong•gija ramao dilsretgenchimode uan a•songko nisigiparang ong•skana ama ine parakataha.
A•songni chadamberangna a•gilsakni seng•aniko on•engani gimin Loyola Academy gita dakgipa skie on•chakram institute-rangko mittelpilangengon, political dilgiparang ong•e pangnan chadamberangna baksa agangrikjringna aro chadamberangni changa sapanirangko namao jakkalrongna nanga ine Chief Minister parakataha.
A•songko dal•roroatna gitade chadamberangosa pangchakna nanga ineba ua aganaha.
Ia Annual college day-ko manianio, Loyola Academy-o kam ka•giparangna, chatro chatrirangna aro gipin membor-rangna dingtangmancha Chief Minister-ni jakchi memento-rangkoba suale on•angaha.
Hyderabad songjinmaona re•angani somoio Meghalaya a•dokni Chief Minister, Telangana a•dokni ITE & Communications Minister KT Rama Rao-koba grongjolangaha.
