Shillong, April 27: Shillongni Ram Krishna missionko a•bachenganiko gisik ra•e manie, butbar salo Swami Vivekanandani Shillongona re•baani chang 121 gipa gapaniko gisik ra•e Ramakrishna Mision Vivekananda cultural centre Shillongo maniangaha. Ram Krishna mission dingtang dingtang changa-sapanirangko skiram biap ong•a, jeon computerko skiani, ku•sik aro uandake dingtang dingtang changa-sapaniko skiram ong•a. Ia tom•anio NEIGRIHMSni director Nalin Mehta mongsonggipa sokgipa ong•e bak ra•angpaaha. Rev. Swami Sukhananda Maharaj, Ramakrishna Math, mangba tom•anio dongpaaha.
Shillong songjinma dingtang dingtang a•selrangni gimin mingsinggipa ong•a. Indiani mingsinggipa aro rongtalgipa mande ine chanako man•gipa Swami Vivekananda Shillongona re•baaniara namen rasong chabeani ong•chongmota. Swami Vivekananda 1901 bilsini April 27 tariko, ua somaio Quinton Memorial Hall ingipa biap jeon da•ode Ram Krishna Mission Vivekananda Cultural Centreko rikskaachim uno bon•kamgipa skiprakangaha.
