31.6 C
Tura

Chang 49-gipa M’laya Day-ko manianio a·dokni CM, gitcham dilgiparangko gisik ra·a

Must read

Shillong, Jan 21: Meghalaya a·dokko man·chengaoni bilsi 49 gapaniko da·al January-ni 21 tariko a·dokni dingtang dingtang biaprango manitokengon, ia salko Shillong songjinmani U Soso Tham Auditorium-oba maniangaha aro ia salko manianio Meghalaya a·dokni Chief Minister Conrad K Sangma, mongsonggipa sokgipa ong·e jinmana aganprakangengon, Meghalaya a·dokko man·e on·na gita an·tangtangko on·kange kam ka·anggipa gitcham dilgiparangko mittelpilangaha.

Ia salko manianio a·dokni Chief Minister baksana Information & Public Relations Minister James PK Sangma, Home Minister Lahkmen Rymbui, Health Minister AL Hek aro dingtang dingtang sorkari officer-rangba dongpae bak ra·angaha.

Meghalaya a·dokni bilsi 49-na re·mikkangbaanio namroro silroroani, sorkariko chalaiani aro a·doko songdongenggipa manderangba dingtang dingtang kamrango chu·sokgipa ong·na man·aha ineba Chief Minister parakataha.

“Batanggimin bilsirango, noksa salani, ki·tap seani, doka dam·ani, kal·susaani, songsalna dangdike on·ani aro uandakgipa dingtang dingtang kamrangchi a·dokna mikkim rasongko ra·bagipa mande pilakkon ia salo anga salam ka·enga,” ine Sangma aganaha.

Meghalaya a·dokko gipin a·dokrangna dakmesokgipa a·dok ong·atna gita sorkari, namroro silroroatani kamrangko ta·rakbatatna miksonganirang dongenga ineba Chief Minister aganaha.

“Chinga miksonganian da·o bilsi 10-ni gisepo Meghalaya a·dokko, dingtang dingtang kamrango India a·songni nambatsranggipa dam 10 a·dokrangoni damsa ong·atani ong·enga,” ine Sangma parakataha.

Meghalaya a·doko re·a doani kolrangko tang·doatna gita sorkari rake kamko ka·aha ine janapatengon, “Meghalaya a·dok gimikon mongsonggipa rama jal·langrangko taridapna gita gong kror 1,200 tangkarangko sorkari chamenga aro an·seng baljokani a·baoba dam 659 sanram biaprangko ra·dona gita sorkari tarisoengaha,” ine Chief Minister aganaha.

Songadam nokadamrangnaba sorkari gisikko on·e kam ka·enga ine janapatengon, “Ia bilsiode MGNREGS program-ni ning·o koros ong·ani gong kror 1,600 gapgnok ine chinga ka·dongsoenga aro ia bilsio gong kror 1,600 gapahaode 2018-19 bilsio gong kror 847 koros ong·aoni changgni tang·doa gita ong·gnok. Songadam nokadamrango me·chikrangba a·dokni self help group (SHG)-rango bakko ra·e ia sal somoirango an·tangtangna janggi tangani cholrangko dake ra·tokengaha,” ine Chief Minister parakataha.

Gama ge·ani kamrangko namdapatani bidingo janapatengon, “Meghalaya a·doktangon wakrangko chu·onga gita man·na, a·doko songdongenggipa manderangna namgipa cha·anirangko on·na aro jilla kaanirangko dake cha·enggipa hajalni hajal nokdangrangna janggi tangani cholrangko on·na gita sorkari, Piggery Mission-ko a·bachengataha,” ine Chief Minister parakataha.

Re·baenggipa bilsiode Meghalaya a·dokko man·chengaoni bilsi 50 gapgnok ine janapatengon, “Mikkang bilsio Meghalaya a·dok bilsi 50 gapaniko manigen aro apsan somoion India a·songni jakgitelani bilsi 75 gapanikoba manigen. Ia dingtangmanchagipa salna chinga dingtang dingtang program-rangko tarisoengaha aro iana chinga dingtangmancha angni dilanichi aro cabinet minister-rang aro dingtang dingtang dilgiparangni bakrimanichi committee-koba songsoenga,” ine Chief Minister parakataha.

More articles

LEAVE A REPLY

Please enter your comment!
Please enter your name here

Latest article