Shillong, September 6, 2021: A·songko mikkangchi bimang ong·atna tarianio skigiparangni bimchipe on·gilanirangna uamangko dingtangmancha mande ra·pilskaaniko dakna, Shillong songjinmani Meghalaya Bharat Scouts and Guides State Headquarters, Auditorium Hall-o tom·aniko ong·ate a·dok sorkari mijal Sombar salo chang 60-gipa State Level Teachers’ Day-ko maniangaha.
Manianio, Meghalaya-ni Education Minister Pa Lakhmen Rymbui, mongsonggipa sokgipa ong·e tom·aniko mikkim gnangataha.
Tom·ao aganprakangengon, sajinmani a·sel dingtang dingtang dakgipa neng·nikanirangko chagrongmiting somoio a·dok gimikoni skie on·gipa dolko dintangmancha de·mittele aganangan baksa, classroom-o skie on·aoniko online gita skie on·aniona ra·baani skigiparangna altubea kam ong·jagenchimoba chatrorangna skie on·anio uamang bimchipe aro rake kamrangko ka·anichi pilak neng·nikanirangni kosako chebana gita man·aha ine Pa Rymbui agandapataha.
Da·omiting somoio betonrangni bidingo skigiparangni bang·a neng·nikanirangko chagrongtokengani gimin janapatengon, iandakgipa neng·nikanirangko namatna gita sorkarini on·kange aroba dondikgija ja·kurangko de·atengani giminba Pa Rymbui janapatjolaha.
Unomiting salni bako tom·anio, a·dok gimikoni nambatsranggipa skigiprangko dingtangmancha seoke State award-rangkoba gimik sak 13 dingtang dingtang skulrango skigiparangna on·angaha.
Unbaksana, District award, Special Award (Inclusive School), Best Scoutmaster award aro Best Guide Captain award-rangkoba dingtang dingtang skigiparangna on·angjolaha.
Meghalaya School Improvement Programme-ni ning·o a·dokni dingtang dingtang skulrangnaba gadang 3-ni ning·o award-rangkoba on·angaha, jeon Implementation of School Improvement plan-ni award-rangko Ri-Bhoi district-ni Umroi Presbyterian Higher Secondary School, West Garo Hills-ni Garo Union Higher Secondary School aro East Khasi Hills-ni Mawngap District Christian Multipurpose Higher Secondary School-na on·angaha.
Unbaksana, Best Performance District Resource Groups (DRGs)ni award-rangkoba East Khasi Hills District, West Jaintia Hills District aro West Garo Hills District-na on·angaha.
Programo, Education department-ni Secretary Pa R. Rapthap, aro Meghalaya-ni School Education & Literacy -ni director Pa A. Ch. Marak aro bang·a gipinrangba bakko ra·angtokaha.
