Shillong, Mar 31: India a·song gimikni chang 83-gipa National Table Tennis Championship 2022-ko Meghalaya a·doko sokachakgen ine Bristibar salo, Meghalaya Chief Minister Conrad K Sangma parakataha.
Da·o dipet Meghalaya a·doko sokachakgipa kal·susaanirangoni ian dal·batsranggipa kal·susaanirangoni mingsa ong·enga aro salgro salaram a·dokrangni gisepoba ian gnigipa changna ia Table Tennis Tournament-ko sokachakani ong·enga.
Ia kal·susaanio komibeoba sak 650 bak ra·giparang sokbana ka·dongenga aro ianoni sak 450-de kal·susagiparang aro gipinrangde coach aro dakchake on·giparang ong·gen.
Ia kal·susaaniko sokachakna gita komibeoba ge 300 kuturirangko tarisoengaha aro gipin kamrangkoba ka·soengaha.
Ia kal·susaani ba tournament-ko Shillong songjinmani NEHU-o donggipa Sai Indoor Training Centre-o ia 2022 bilsini April 18 tarikoni April 25 tarikona ong·atanggen.
Ia kal·susaaniona Haryana a·dokni deputy chief minister, jean Haryana Table Tennis Association-ni president-ba ong·engachim unbaksana dingtang dingtang a·dokni dilgiparangba sokbana ka·dongsoenga ine Meghalaya Chief Minister Conrad K Sangma parakataha.
Ia tournament ba kal·susaaniko Meghalaya a·dokni bilsi 50 gapaniko maniani bak gita a·doko sokachakenga aro ia kal·susaaniko sokachakanio gong kror 1.5-mang koros ong·naba gnang ine Sangma parakataha.
Ia kal·susaanio Meghalaya a·dokoniba sak 10 kal·susagiparang bakko ra·naba gnang.
